Ghöz | SnGhome.UK
旅程最後一天
今天行程都是一早起身
執齊包袱便開車去門司
個幾鐘車程喺今次旅程算係短途了
中途只停低食個早餐
九點左右便到達目的地
我哋四圍行吓影吓相
再去鐵道博物館參觀
那裡有很多舊式蒸氣火車頭同埋車廂
逐款睇吓玩吓都幾過癮
參觀完後便去排隊食燒咖喱
這個是門司港嘅特色美食
雖然唔係名貴食材
只是咖喱磚加飯加芝士再加蛋
但燒焗後效果很好
返到去要研究吓點複製
吃飽後便正式結束今次旅程
要踏上歸途了
個幾鐘車程回到福岡機場還車
但太早 HK Express 未開始 check in
我哋坐埋一邊上網 hea 吓
到夠鐘便辦好手續
入到禁區便最後一擊
女皇繼續有斬獲
臨上機前食埋個最後的晚餐
然後幾個鐘機程後九點半降落香港
九日行程完結了
不過明天都攞咗假可以抖吓執吓嘢
但後日又要回到現實繼續努力搵錢
準備出年嘅旅行了
今日晨早八點前便開車
揸兩個幾鐘去九十九島
山長水遠便是為了個蠔祭
雖然啲蠔唔係咁靚
但食個氣氛已經值回票價
設施準備好哂
食材準備好哂
價錢可以叫做超值
唯一係要來回路程差不多五粒鐘
食完炭燒生蠔後
又要開兩個鐘車返回福岡
返到酒店放低背囊後
我哋再出擊掃藥妝
但我行了一陣後已經攰到爆炸
於是女皇自己繼續去血拼
我就搵間星巴克抖抖等佢慢慢玩喇
血拼之後我哋又返酒店擺低戰利品
然後便去食晚餐
最後一晚我哋都冇乜心水食乜好
於是便求其去一蘭本店試吓
我曾經喺香港食過一次
但感覺麻麻唔係傳聞中咁好味
不過一場嚟到人哋主場便盡管試一試
可惜都係冇想像中的好味
食完後再行一陣返酒店
九州之旅最後一晚
節目都係打包戰利品
今次兩個喼仍然游刃有餘
睇嚟我哋都仲係唔入流
要再加把勁了
由熊本北上最後一站福岡
中途去咗太宰府參觀吓個神社同表參道
然後便去 Tosu Premium Outlet 血拼
我哋差不多兩點到達
原本以為有好多時間可以慢慢睇樓
但行吓行吓又好似唔係好夠時間
卒之行到就嚟閂門先肯走
不過收穫豐富
買得心頭好後便前往今晚的酒店
Check in 完上房擺低行李後
便落樓搵屋台吃晚餐
我們沿途見到都有幾間但不多
但行到去中州屋台橫町搵極都搵唔到啲屋台
後尾有人同我哋講話條橫町已經冇咗了
咁樣我哋唯有返轉頭去返頭先經過果幾檔啦
返到過去見有檔有位我哋便坐下去
然後指手畫腳點了幾樣餓釘同串燒
仲有一碗拉麵同一支啤酒
食物不算美食但風味別處難求
食飽後便回酒店執定包袱
觀賞吓戰利品
一年一次大出血真係好開心
每天工作嘅動力就是為了這幾天
諗起玩多兩日又要返工
心情又開始忐忑了⋯⋯
基本上每日都行程緊密
今天七點起身便去浸一浸
然後在房內食個日式早餐
之後執齊包袱便上路
今日第一個景點係鍋之滝
果度條瀑布可以穿過後面行過的
都幾得意
睇完條滝後又揸一粒鐘左右
上到阿蘇火山對面的大観峰
上到山頂遠眺環山風景美不勝收
拍拍照行一陣便開車入城了
接近兩小時車程後到達熊本
到達後首先去參觀熊本城
個城有部份因為16年地震而損毀
情況都幾嚴重
成個城都已經封閉了
只能在外圍路過參觀
遊完熊本城後便去酒店 check in
安頓好後便出街行吓
買吓手信飲杯珈琲
行到八點便去食個黑亭拉麵
食飽後便返酒店休息了
唔知點解今日對腳好攰
精神有點差
可能連日長途行駛令到精神疲累
今晚都係早啲抖了