又捱過一星期
仲可以走幾遠呢？
這個農歷新年滑雪團
無論日期時間地點都天衣無縫
但係一樣係就唔到⋯⋯
不過反而覺得更加好
可以避開新年旺季附加費
兩個人來回條數差成皮嘢
慳慳埋埋走多轉短程都唔錯喎
又到星期五
仍然勇猛
部 D800 用咗接近五年
快門都未過二萬
其實係用得多定少呢？
去過澳洲、台南、紐西蘭、關西同埋挪威
初時唔識用到現在都摸熟部機了
影出嚟嘅相非常滿意冇投訴
性能依然強勁根本冇必要更換
唯一係因為屎忽痕見同級 SONY A7RIII 比佢輕同細
所以先心郁郁⋯⋯
但新機價要二萬幾同埋要換過哂啲鏡頭
即時簫叔叔響起退堂鼓
都係繼續用 D800 啦
今晚發生了件奇怪嘅事
想開始執相（其實之前開始咗但又停咗換NAS）
發現之前已經執好放咗喺隻 NAS 嘅相
有個 folder 入面唔見咗大部份嘅相
都幾驚吓以為錯手 delete 咗
即刻搵吓有冇 backup
好彩平時 light room 嘅相就唔會 backup 去硬碟
但咁啱?個 folder 又有喎
於是又抄返入去隻 NAS 啦
奇怪嘅事程就發生了
明明唔見咗嘅相毛啦啦又出現番
真係唔知發生乜事
等我攪咗大半晚攪到夜一夜
抄嚟抄去但原來明明已經喺個 folder 入面
點解我初時只見到四百幾張相
但原原本本二千幾張相本身就喺度
點解我會見唔到嘅呢？
真係好奇怪要記錄吓
更換歡樂卡
回鄉証過咗期幾個禮拜
今天先特登請假去申辦換領
之前都曾經嘗試去上環攪但太多人被迫放棄
反而今日去旺角果間又唔算太多人
網上登記預約了時間
去到攞張籌
填好表影張相等叫 number
之後埋到櫃位對好資料交好錢便攪掂
兩個星期後便可以返去攞新卡
過程比十年前快咗都算有進步嘅
妙想天開
近排好動盪
但又無能為力
唯一可以做嘅係買六合彩
然後中六合彩
跟住 un un 腳食花生等退休