病住起程病住返歸
不幸中之大幸係返到嚟先爆
發燒感冒喉嚨發炎都幾嚴重
仲有兩日 sick leave 添
不過唔係我病
所以收拾工作依然進行
亦都駕輕就熟好快手攪掂哂
聽日又要回到現實喇
2026濟州．DayX
2026濟州．Day5
又到咗旅程最後一日
行程都冇咁多
起身執好行李就出發
去咗個岸邊好近距離睇發電風車
原來企喺個風車下面
係會聽到好大聲發發聲
同埋個風車都真係好巨型
睇完風車先去食早餐
坐喺度望住堆風車
嘆住杯朱古力加個 cake
發住吽哣應該都可唔可以坐半日
不過我哋坐一陣就繼續上路
去咗挾才海灘行個圈
跟著就去食鮑魚粥
今次旅程連續五日食鮑魚
但一啖酒都冇飲過
個鮑魚粥就一般般
未試過可以試吓
食飽再過去涯月咖啡街飲吓咖啡
沿海有幾間咖啡店又係可以對住個海
望住啲風車嘆住杯啡發吽哣
但係突然發生突發事件
有架車起火仲要係我哋泊車後面幾個車位
於是乎要緊急開車疏散
然後繼續上路去咗另一個岸邊
睇吓油咗幾種顏色嘅石搏
打吓卡睇吓嘢然後就開車返市中心
行咗一陣樂天超市
跟著就食最後晚餐
今晚食豬腸牛腸鍋
都幾抵食又幾好食
可惜都係冇得飲啤酒
始終都係未夠完美
食飽後就去還車
然後去機場踏上返歸之路
去到機場盡最後努力洗哂啲現金
跟著上機飛三粒鐘返到香港
攞齊行李打的返到屋企已經凌晨一點幾
快速輕輕整理一吓便沖涼瞓覺
聽日先算
2026濟州．Day4
今趟旅程輪流病住玩
好少去旅行會滴酒不沾
不過就連續四日都有鮑魚食
今天都係行程緊密
不過就冇之前咁趕
第一站去食個 Bagel 加杯咖啡
然後就去天帝淵瀑布行吓
雖然話有三條瀑布
但係啲瀑布就流流地
睇完之後幾分鐘車程
去到大浦海岸柱節理
睇啲六角柱坑紋岩石
其實又係同西貢果啲差唔多
去旅行就係咁
未去過唔知所以咪就係要睇吓囉
行完就去食韓牛
炭爐燒的確好味啲
冇和牛咁油膩
食飽之後就去玩燒槍
第一次真槍實彈射擊
跳彈殼又有後撞力
體驗都唔錯
打完手槍又去個茶園食個 tea
成個茶園好商業化
有得食有得行公園
仲有唔少得比你購物
參觀完後就去咗 outlet
行街 shopping 同主要係去退稅
果度又有間 snowpeak 又有少少斬獲
買完嘢辦理好退稅手續後
又去食鮑魚
今晚食西餐
不過都有碟鮑魚意粉
味道都幾好不過好多飛吓飛吓嘅蚊蟲
快快食完又玩完一天
聽日就要離開濟州返歸了
2026濟州．Day3
好似玩咗好多日
但其實今日只是第三天
未天光已經有節目
就係瞓喺張床度睇日出
好好天又萬里無雲
可惜係比棵樹阻擋咗個最佳位置
不過都冇投訴
睇完一秒瞓落床繼續瞓
瞓醒就執好行李又開始去玩
首先去城山日出峰
食個早餐然後行吓睇吓風景
因為太好天氣加上個景真係好靚
啲相點影都變沙龍
行完城山日出峰後就去 Snoopy Garden
估唔到反而行得仲耐
雖然只係一個公園擺啲史露比公仔
但好有誠意令人慢慢行慢慢打卡
行完之後繼續趕路
去偶來市場食魚生片
質素唔高但勝在平靚正
只係冇得堂食有啲失敗
食飽就起程去今明兩晚住嘅民宿
間屋唔大只分兩層
都幾企理不過對個室外浸浴有點失望
太開陽比人望哂好似睇得唔用得
達陣攞咗屋之後就又去食
經過琴晚教訓今晚就早啲去搵食
十幾分鐘車程去食鮑魚鍋
連續三日食鮑魚
仲有條好鬼長嘅魚
成鍋海鮮都只係四萬幾韓寰
都幾抵食
食飽就返民宿休息了
經過三日高強度旅遊
真係幾攰吓要早啲瞓