距離下個雪季尚餘個多月
應該可以操多四至五課
跑⋯⋯不是為了減肥
只是為了嚟緊嘅雪季
應付歐洲雪場係需要比日本雪場更多的體力的！
第三課
旅行善後
通常去完旅行返嚟之後
我都會請多日假期
去整理一吓旅行後期工作
例如洗衫同收埋啲喼
計埋條數用咗幾錢
整理好拍攝嘅相同片
同埋打掃吓屋企
其實一日時間話多唔多話少唔少都幾忙吓
九州．Day9．再見九州
旅程最後一天
今天行程都是一早起身
執齊包袱便開車去門司
個幾鐘車程喺今次旅程算係短途了
中途只停低食個早餐
九點左右便到達目的地
我哋四圍行吓影吓相
再去鐵道博物館參觀
那裡有很多舊式蒸氣火車頭同埋車廂
逐款睇吓玩吓都幾過癮
參觀完後便去排隊食燒咖喱
這個是門司港嘅特色美食
雖然唔係名貴食材
只是咖喱磚加飯加芝士再加蛋
但燒焗後效果很好
返到去要研究吓點複製
吃飽後便正式結束今次旅程
要踏上歸途了
個幾鐘車程回到福岡機場還車
但太早 HK Express 未開始 check in
我哋坐埋一邊上網 hea 吓
到夠鐘便辦好手續
入到禁區便最後一擊
女皇繼續有斬獲
臨上機前食埋個最後的晚餐
然後幾個鐘機程後九點半降落香港
九日行程完結了
不過明天都攞咗假可以抖吓執吓嘢
但後日又要回到現實繼續努力搵錢
準備出年嘅旅行了
九州．Day8．九十九島燒蠔祭
今日晨早八點前便開車
揸兩個幾鐘去九十九島
山長水遠便是為了個蠔祭
雖然啲蠔唔係咁靚
但食個氣氛已經值回票價
設施準備好哂
食材準備好哂
價錢可以叫做超值
唯一係要來回路程差不多五粒鐘
食完炭燒生蠔後
又要開兩個鐘車返回福岡
返到酒店放低背囊後
我哋再出擊掃藥妝
但我行了一陣後已經攰到爆炸
於是女皇自己繼續去血拼
我就搵間星巴克抖抖等佢慢慢玩喇
血拼之後我哋又返酒店擺低戰利品
然後便去食晚餐
最後一晚我哋都冇乜心水食乜好
於是便求其去一蘭本店試吓
我曾經喺香港食過一次
但感覺麻麻唔係傳聞中咁好味
不過一場嚟到人哋主場便盡管試一試
可惜都係冇想像中的好味
食完後再行一陣返酒店
九州之旅最後一晚
節目都係打包戰利品
今次兩個喼仍然游刃有餘
睇嚟我哋都仲係唔入流
要再加把勁了