Ghöz | SnGhome.UK
有個私人露天風侶真係好
一起身就可以浸溫泉真係好爽
浸一浸醒醒神
然後去食早餐
食飽執好包袱便又再上路
今天行程都幾趕
首先路過九醉溪及九天之竜
然後到九重夢大橋
好快遊完便到白川水源
睇吓個水源頭後便去阿蘇火山口
但很可惜今天火山不停噴灰所以要封山
一場去到但上唔到個火山口有點遺憾
不過仍要向前走
放棄火山口後
繼續前往千里草之濱
影吓相行一吓便繼續趕路去阿蘇神舍
去到又見到裝修緊
去到邊都入唔到非常掃興
於是便開車去今晚住宿酒店黑川溫泉
去到 check in 好後
便出去溫泉街行一陣
買了點手信
然後回酒店浸一浸溫泉
浸完便吃晚餐
今晚溫泉酒店晚餐在房間內
好耐冇試過了
食物亦都很美味
飲飽食醉後再上天台的天文台睇星空
幸運地今晚冇雲
成個天都係星星
睇完星後便再去另一個溫泉浸一浸
最後再飲杯大吟釀
瞓都瞓得舒服啲
今天八週年
將會有更多更多的週年紀念
直到世界末日為止
今日天未光便起身上國見之丘睇日出
但好可惜雲層太厚睇唔到
只見到一線橙紅色的雲層
之後去食個早餐
然後開始今天的旅途
首先是兩小時的車程
去到湯布院行街
條街很商業化
主要都係賣手信為主
不過都有一兩間有啲特別吸引的
我們行了個幾小時後
便搵間珈琲店竭吓
然後再睇吓個金鱗湖
便開車去別府
參觀八個溫泉
初時慢慢行
但後嚟開始唔夠時間
便要趕頭趕命咁去睇
最後都閂門前埋舟睇哂八個地獄溫泉
今日真係由未天光玩到天黑
原先諗住早啲去今晚嘅溫泉酒店
但行程太緊密
睇完地獄谷後已經五點開始天黑
開車去酒店條路又係啲小路好難搵
睇 GPS 帶路去到目的地竟然去錯地方
初時都幾擔心
後尾冷靜地搵地圖
好彩又撞彩搵到間酒店
真係有驚無險到達目的地
去到 check in 後便要食晚飯
今晚係一泊兩食
晚餐食和牛壽喜燒
味道又比炭爐燒唔同
兩者各有各好啦
食飽便返房浸個露天風侶
間房包埋獨立的溫泉
二人前邊看星空邊享受露天溫泉
原本是這樣構思的
但今晚雲多看不到星空
不過私人露天溫泉都已經夠哂豪華
享受完個溫泉後
便滿足地入睡休息
準備明天又繼續緊密的行程了
今天起身後便出街食個 plan cake 早餐
但行到去都只係七點九未開門
唯有等一陣等到佢開門啦
準時八點開門
食物質素都唔錯
不枉我哋等佢開門
食飽返酒店標個檸
然後執齊包袱又趕路
首先揸車一個鐘左右去日向岬
去到時下著雨
我哋擔住遮行咗一陣
可能落雨影響心情
到此一遊影幾幅相便開車走了
之後車程一小時左右便到達高千穗峽
泊好車便去食個lunch
然後便開始遊玩
這裡依然是下著雨
但峽谷帶有濃厚迷霧
夾雜著紅綠黃的楓葉
伴隨著一條一條的大大小小瀑布
襯托著溪流的倒影
風光實在迷人
只可惜落住大雨不能攞單反去拍攝
好彩iPhone拍的照片還可以
遊完高千穗峽便到酒店 check in
晚上出外晚飯但到處都尤如死城
搵咗一陣都只係搵到間拉麵仍然營業
食咗兩晚豐富的
今晚都要慳啲喇
食飽後便回酒店休息
準備明早起身看日出
琴晚瞓瞓吓毛啦啦響火警鐘
凌晨點半鐘瞓到懵髹髹要走火警
拿拿臨著鞋然後拎番銀包電話背囊便衝落街
落到樓下已經企滿人
成間酒店嘅人都好驚慌地走佬
有啲人仲冇著鞋非常狼狽
不過場面不算混亂
後來消防員嚟到
唔知係誤鳴定係真係火燭
後嚟都係虛驚一場
攪咗半粒鐘便返上房
但走完火警後瞓得唔好
瞓到七點又要起身去玩了
今天行程比較多
食完個東橫 inn 早餐後
便 check out 去攞車
去到 Toyota 點知比架大發仔我
真係好失望
但旅程 must go on
開車正式開始我們的九州自駕遊
第一站係要去搭船連車帶人過櫻島
雖然之前喺挪威都試過
不過喺日本就第一次
過到櫻島主要都係浸吓個無料足湯
同埋參觀吓個火山週邊
原來櫻島個火山每年都會爆二百幾次
見到啲大自然災害都幾震撼
但另一方面又會帶嚟肥沃土壤
所以櫻島出產大根特別大條
橫切面可以粗過我條腰十分利害
遊完櫻島去搵嘢食
可惜星期日路過嘅餐廳一係冇開
一係勁多人要等好耐
於是我哋把心一橫
去 Lawson 買個肉飽同飯團算喇
食飽後便趕路
揸兩粒鐘車去鵜戶神宮參觀神舍
路程雖然遠但都值得去睇吓
遊完神舍後原先安排去日南
睇吓果啲扮復活島嘅石像
不過因為唔夠時間所以放棄了
直接揸車去宮崎今晚住宿嘅酒店
個幾鐘車程後到達
Check in 後便出街搵嘢食
因為晏晝食 lunch 慳咗
所以晚餐食豪啲
一於食宮崎牛
原來宮崎牛不等於宮崎和牛
係比較高級嘅食材
我哋叫咗個 set
總共有五款宮崎牛加其他配菜
第一啖咬落去果陣甘香真係冇得頂
不過話雖如此
始終都覺得近江牛排第一宮崎牛第二
食飽後回酒店沖個涼
然後又上頂樓飲杯嘢
完美完結今天行程