Ghöz | SnGhome.UK
今趟旅程輪流病住玩
好少去旅行會滴酒不沾
不過就連續四日都有鮑魚食
今天都係行程緊密
不過就冇之前咁趕
第一站去食個 Bagel 加杯咖啡
然後就去天帝淵瀑布行吓
雖然話有三條瀑布
但係啲瀑布就流流地
睇完之後幾分鐘車程
去到大浦海岸柱節理
睇啲六角柱坑紋岩石
其實又係同西貢果啲差唔多
去旅行就係咁
未去過唔知所以咪就係要睇吓囉
行完就去食韓牛
炭爐燒的確好味啲
冇和牛咁油膩
食飽之後就去玩燒槍
第一次真槍實彈射擊
跳彈殼又有後撞力
體驗都唔錯
打完手槍又去個茶園食個 tea
成個茶園好商業化
有得食有得行公園
仲有唔少得比你購物
參觀完後就去咗 outlet
行街 shopping 同主要係去退稅
果度又有間 snowpeak 又有少少斬獲
買完嘢辦理好退稅手續後
又去食鮑魚
今晚食西餐
不過都有碟鮑魚意粉
味道都幾好不過好多飛吓飛吓嘅蚊蟲
快快食完又玩完一天
聽日就要離開濟州返歸了
好似玩咗好多日
但其實今日只是第三天
未天光已經有節目
就係瞓喺張床度睇日出
好好天又萬里無雲
可惜係比棵樹阻擋咗個最佳位置
不過都冇投訴
睇完一秒瞓落床繼續瞓
瞓醒就執好行李又開始去玩
首先去城山日出峰
食個早餐然後行吓睇吓風景
因為太好天氣加上個景真係好靚
啲相點影都變沙龍
行完城山日出峰後就去 Snoopy Garden
估唔到反而行得仲耐
雖然只係一個公園擺啲史露比公仔
但好有誠意令人慢慢行慢慢打卡
行完之後繼續趕路
去偶來市場食魚生片
質素唔高但勝在平靚正
只係冇得堂食有啲失敗
食飽就起程去今明兩晚住嘅民宿
間屋唔大只分兩層
都幾企理不過對個室外浸浴有點失望
太開陽比人望哂好似睇得唔用得
達陣攞咗屋之後就又去食
經過琴晚教訓今晚就早啲去搵食
十幾分鐘車程去食鮑魚鍋
連續三日食鮑魚
仲有條好鬼長嘅魚
成鍋海鮮都只係四萬幾韓寰
都幾抵食
食飽就返民宿休息了
經過三日高強度旅遊
真係幾攰吓要早啲瞓
一如以往有人話今日冇乜行程唔趕㗎
我哋嘅旅行不嬲都係咁
起身梳洗完畢九點出發
首先去 Coffee Temple 嘆杯珈琲
環境好好杯啡都好好味
飲完啡先去食早餐
去咗 London Bagel 食個多蔥忌廉 Bagel
兩個人食一個飽就反咗艇
食完行吓跟著就繼續行程
去咗咸德海灘行吓山
輕行一陣又去食 lunch
是日午餐有海膽丼加海鮮泡麵
海膽蓋飯雖然好食
但勝價比反而個海鮮麵贏咗
蝦蟹好鮮甜有驚喜
食完再去 Olive Young 掃貨
滿載而歸後再去月丁里沙灘
行吓又飲杯果汁
跟著去今晚嘅 AirBnB 放低行李
今晚住嘅民宿好別緻
樓高三層地下係廳
中層係廁所同埋個沖涼浴缸
頂樓係睡房
聽落好大其實每層都只係咁
仲要行上行落都幾攰
玩完間屋後又出去繼續玩
去咗 orrrn 又飲珈琲
飲住杯啡又諗吓今晚食乜
可惜計畫追不上變化
途中去咗入油但兩條友唔識字
都係要麻煩大叔幫手先入到油
最大鑊唔係入油
原先諗好果間餐廳去到見到好唔對路
最慘係肚痛要緊急爆發
慌忙中好彩又搵到間 Starbucks
即刻衝入去核爆
解決完一場災難後又要面對另一個問題
原來搵食艱難濟州郊外小鎮好早打烊
多數晚上八點就閂門冇乜嘢食
最後搵到間食炸雞收十二點
又好好彩都幾好食
醫好個肚就返去民宿休息
準備聽日繼續高強度旅遊
幾十歲人學人坐凌晨機
通頂咁滯瞓吓醒吓
瞓唔到一粒鐘嘅情況下
三小時機程朝早六點幾就降落濟州島
又好順利入境攞行李再攞埋車
痾埋篤屎先出發去食早餐
八點幾食碗扇貝刀削麵加碟餃子
正正常常扇貝唔係輻射size
唔係特別好食但又唔差咁囉
食飽就開車去9.81公園玩
用地心吸力玩嘅賽車
其實同十年前喺紐西蘭玩果隻差唔多
都過癮嘅
除咗賽車仲有其他嘢玩
有碰碰車、war game、angry bird
仲有超級無敵唔知乜
玩吓再飲杯咖啡再行一陣就走喇
出返市區去酒店開房
然後急差一小時
跟著又出去行街
買吓手信行吓 snowpeak
又會睇啱個袋真係好
買完心頭好返酒店放低戰利品
就出去食晚飯
今晚食五花腩鮑魚餐
六萬韓圜兌返港幣三百幾蚊左右
兩條友又食得哂好叻仔
不過今日病住咁玩
到中午仲失聲添🫣
咁高強度嘅旅遊行程
咁嘅年紀真係要頂住呀😆