在法國的第二天滑雪
都係瞓到七點起身
食完早餐抖一抖
然後著衫出去體力勞動
今日初時都有一陣雪
但好快又陽光普照
我哋今日走到雪場最左邊玩
上晝玩到十二點左右便食嘢休息
跟著便準備滑返過酒店
但行錯路又要去返起點重頭上路
最終又係揸乾最後一滴精力
差不多五點開始天黑先返到去
喺歐洲嘅雪場就係大得咁緊要
歐洲滑兩日等於日本滑咗三四日
真係體力少啲都唔掂
2019法國滑雪之旅．Day05
2019法國滑雪之旅．Day04
第四日
今天正式開工
七點起身梳洗後便去食早餐
食飽便開始上裝備
十點出發今季第一滑
今次個場冇前年瑞士咁大
但係個地就好啲冇咁冰
不過啲lift好多都冇開
仲要有啲track係閂咗唔比滑
攪到都唔知點滑好
誤打誤撞又入埋黑色track
最後玩到筋疲力盡
三點便收工了
年紀大了體能應付唔到咁大運動量
但係又好想 keep 住滑雪嘅衝勁
真係好茅盾⋯⋯
2019法國滑雪之旅．Day03
今天瞓到六點左右
起身痾完篤尿後就瞓唔返
眼光光到七點幾就起身落去食早餐
食飽執好行李便退房
然後出街行吓
無所事事週圍行吓
再飲杯咖啡後便回酒店集合
拎齊行李上車
四小時車程左右
便由意大利去到法國
今次嘅滑雪酒店都唔錯
我哋安頓好後便出去行吓
有人又有收穫買到 face mask
之後去超市買啲零食飲料返酒店
晚上七點便去吃晚餐
今次這間酒店嘅食物都幾好味
吃飽後便回房 hea 吓
飲杯紅酒上吓相
研究一吓明天嘅滑雪路線
然後便上床瞓覺
差足電準備今季第一劈
2019法國滑雪之旅．Day02
坐咗十二粒鐘以上
瞓吓醒吓屈住屈住
到德國慕尼克時係五點零鐘
機場好多店鋪都未開
等了兩粒鐘左右轉機去米蘭
又坐一粒鐘後便到達
再坐個幾鐘車去酒店
好好彩去到酒店可以提早 check in
攞咗房放低行李洗個臉
便出去行吓
主要係去參觀米蘭大教堂
白色外牆都幾特別幾靚
影吓相打吓卡例行旅遊動作
參觀完後便行過隔離艾曼紐二世迴廊
食咗個豐富午餐
食飽再去睇埋個城堡及小凱旋門
米蘭話大唔大話細唔細
我哋第一日便行完了
晚上求其食間地道 pizza
再看看晚上的大教堂
第一天行程都係舟車勞頓吃喝玩樂中渡過
返到酒店原本買定紅酒芝士慢慢嘆
但沖完涼瞓落床便睡魔急call
所以都係留返入到雪場先慢慢嘆啦